【明報專訊】上周六全國港澳研究會副會長劉兆佳喺電台節目上話，記不起自己1989年有簽過聲明譴責六四事件北京血腥鎮壓，有讀者心水清，搵番佢當年6月10日刊於《明報》嘅《香港六所大專院校 教職員聯合聲明》，幫劉教授尋回記憶。Emily都好奇翻查呢份聲明，仲發現當年任職城市理工學院嘅現任運房局長張炳良，都有聯署㗎。 劉：聞無表態反對即同意 Emily噚日再打畀劉兆佳，話佢知有讀者搵番當年聯署聲明，劉教授就話終於記起當年收過份聯署聲明，但就唔記得當年有無處理過，但佢後來聽聞嗰份聲明只要無表態反對，就等於同意簽署，而事隔25年，佢話已經唔記得當時嘅發起人係邊個喇。 當年有超過1100人簽署聲明，張炳良都有簽。Emily噚晚搵張局長求證，張炳良透過新聞秘書回覆，話佢「仍記得89年6月曾聯署聲明，譴責當時官方就天安門民運事件的處理手法，至今對此仍未能釋懷，認為是一宗歷史悲劇」。 張炳良有聯署：仍未能釋懷 除咗劉、張嘅名字，當年仲有一班教授簽署，包括當時喺中大任教嘅蘇鑰機、梁偉賢、石丹理、何順文、文植良和郭少棠等。港大教職員就有程介明、羅致光、潘宗光、周永新、韋永庚、陳文鴻和龍炳頤等，仲有城市理工學院嘅劉國裕，浸會學院嘅謝志偉，同埋嶺南學院嘅李彭廣。 份聲明指中國當權者踐踏人權，草菅人命，Emily完全感受到當時一班教職員心中嘅悲憤；聲明又呼籲全中國人民，用「一切可行的辦法，立即制止北京當權者的野蠻暴行」，未知25年後嘅今日，仲有冇學術界搞呢類聯署呢？
|
| |
| |
;){kind=small}
