【明報專訊】港人現時提起「旅遊景點」，或者會不其然諗起廣東道名店、連鎖藥房同金舖之類，不過美國有線新聞網絡(CNN)早前就有一篇「香港相比其他地方十大優勝之處」文章，提到香港嘅十大優點，包括多達9個聲調嘅廣東話、罪案率極低、交通便利等等，仲特別稱讚以竹搭棚嘅技術，形容呢班搭棚工人猶如「敢死隊」(Daredevil)，非常之觸目驚心咁話。

讚搭竹棚工人如敢死隊

繼兩年前旅遊指南Lonely Planet將香港定為「遊行之都」，成為十大必去城市之後，美國CNN對香港嘅旅遊「景點」又有另一番睇法。當中港矛盾升溫，雙方仲拗緊要講普通話定廣東話之際，CNN就將廣東話定為香港十大優勝之處，認為廣東話多達9個聲調，比起普通話、泰文、越南文仲要多，而且每個音都有唔同意思，仲有唔少生活常用潮語，令佢哋嘖嘖稱奇。

CNN又話香港罪案率、兇殺率極低，又讚香港嘅交通便利、無消費稅、美食繁多、機場連接市區便捷等等，當然唔少得香港嘅摩天大廈、酒吧林立嘅蘭桂坊，仲有大量揚威海外嘅功夫電影。