【Emily】建議生動手法教育年輕人 CY買斯諾登紀錄片贈中學
【明報專訊】全國政協副主席、前特首梁振英(CY)噚日接受商台節目《政好星期天》訪問,批評美國喺世界上到處點火,利用第三方衝擊戰略對手,例如利用烏克蘭衝擊俄羅斯、利用香港滋擾同衝擊內地。佢形容外部勢力同病毒同樣存在,大家要有防範意識,尤其係學校。CY話,年輕人有理想,但有時會衝動同激進,學校要教育年輕人,建議可用生動手法,唔一定要硬邦邦。
盼學生了解美國政府做咗乜
CY話早幾年有套紀錄片《第四公民》(Citizenfour,圖)喺香港上畫,佢同院商洽購咗呢套電影版權,製作一批光碟,送畀480間中學,令同學了解美國中情局前僱員斯諾登幫美國政府做咗乜,希望令大家開竅,然後認識,繼而警惕。
翻查資料,《第四公民》2015年5月喺香港上畫,電影記錄斯諾登喺2013年逃亡到香港,匿藏喺尖沙嘴一酒店,向英國《衛報》記者爆料,揭發美國政府監控計劃。斯諾登在港期間,正值CY嘅特首任期。CY上年喺一場國家安全教育活動睇過《第四公民》。