【Emily】李家超視像見議員 梁君彥與阿仔同框

[2022.04.18] 發表

【明報專訊】唯一特首參選人李家超繼續競選活動，噚日用視像形式見立法會議員，雖然連提名都未正式確認，有唔少議員已經恭喜佢獲得過半選委提名。行政會議成員林健鋒仲叫李家超做「候任特首」，政界資歷比較深嘅內會主席、民建聯李慧琼就叫李家超做李sir，李家超前上司、保安局前局長黎棟國就叫番佢做John。

林健鋒叫李家超「候任特首」

唔少議員席間提及新政府組班問題。做過政助嘅陳凱欣建議李家超要挽留人才，如果唔係問責官員就會離開政府，並話「坐你隔籬就已經有一個」。坐喺李家超身旁嘅有競選辦副主任、政制及內地事務局前局長譚志源，譚之前加入競選辦，政圈就熱議佢會唔會入番政府。

視像交流會期間，曾表示以憲制中立為由無提名李家超嘅立法會主席梁君彥都有出席，並率先發言，佢對李家超及將來團隊好有期望，相信佢係有抱負、有智慧、有魄力。梁君彥今次仲同阿仔、李家超競選辦副主任梁宏正「同場」參與交流會，不過兩人就無特別交流。

更多港聞

【明報專訊】移民英國嘅香港公共醫療醫生協會前會長馬仲儀喺醫學期刊分析本港第五波新冠疫情點解咁嚴重，指除咗醫療系統長期不勝負荷，仲包括疫苗猶豫... 詳情

【明報專訊】民建聯立法會議員顏汶羽上年成為新手爸爸，𠵱家阿仔約9個月大，原來BB喺上年立法會選舉前入咗醫院，留醫咗成個月。顏汶羽噚日喺fa... 詳情