【Emily】河套方艙高速通氣駁電創紀錄
[2022.04.02] 發表
【明報專訊】本港第五波疫情嚴峻，建造業利用「組裝合成」建築法(MiC)快速興建檢疫設施，建造業議會主席何安誠噚日喺網誌發表題為〈MiC再創奇蹟〉文章，話特區政府委託中國建築國際集團有限公司承建其中8個援建項目，部分項目用咗預製組合屋同MiC技術，能夠喺短時間內完成，佢形容係再次證明MiC技術「快、靚、正」。
何安誠提到，建造業議會早前聯同中國路橋同香港寶嘉，將一批貨櫃改造成可供員工休息嘅空間，率先捐畀基督教靈實協會、聖公會將軍澳安老服務大樓同東林念佛堂，為前線醫護同院舍職員打氣。
佢又話，落馬洲河套區應急醫院喺2月下旬迅速推進，水電煤供應亦要盡快準備就緒，中華煤氣近200人團隊以破紀錄4日時間，貫通全長1.5公里煤氣管線；中電亦用咗短短10日，由米埔變電站鋪設長達8公里電纜到河套區，喺通氣駁電方面可謂刷新紀錄。
更多港聞
相關新聞
