【Emily】阿德徵女廁意見 怨聲紛至 清潔龍自稱公廁KOL 網民留言：好污糟好臭

「清潔龍阿德」噚晚再喺facebook出post，話大家嘅心聲收到喇，仲唱晒歌「女廁我望真你！女廁我望真你！坐嗰廁板無乜顧慮？」（清潔龍阿德fb圖片）

【明報專訊】食環署吉祥物「清潔龍阿德」前日喺facebook自稱係「公廁KOL」，話觀察到好多女士都唔願去公廁，想問吓大家點樣可以做好啲，最有insight最合適嘅意見，將會獲得「阿德清潔概念大碟」一隻。阿德吸引到超過170個留言，唔少網民提到公廁好臭、地下多水漬、好污糟。阿德話，濕嘅問題佢都解決緊，𠵱家翻新緊嘅公廁都會提升硬件，令濕度可以低啲，就會冇咁臭。

至於有冇辦法防止「血災」或無影櫈，阿德話嚟緊新嘅公廁會有廁板消毒劑，但網民話如果上手用到塊廁板有尿漬，就算有消毒劑都唔會想抹。唔少網民都關注清潔工待遇問題，問可唔可以改善下公廁姨姨叔叔嘅薪酬福利，批評𠵱家好多承辦商都好刻薄。

前線清潔工待遇受關注

代表清潔服務業職工會嘅「清潔龍阿珍」都有留言，分享前線廁所清潔工嘅經驗，話其中一個最大問題係公廁使用量太高，抽水系統好易壞，往往要等好耐部門先call到人嚟處理，但其間啲人會照屙，然後清潔工就要用人手倒水冲廁。阿珍仲提到人手分配、工友裝備同待遇問題，反問疫情期間「廁所工友有冇眼罩呀？啲水鞋係公司買定係要工友自己買呀？咁厭惡性嘅工作(尤其是某啲人流極高的公廁)，政府肯出幾多錢，搵到咩人去做？」

阿德噚晚話收到大家嘅心聲，有啲地方默默努力緊，又話會整多啲休息空間畀清潔工友等，好希望用家都幫吓手，一齊保持清潔。

更多港聞

【Emily】梁卓然做法官？ 司法機構唔答

【明報專訊】前刑事檢控專員梁卓然（圖）舊年辭職，過咗9個月，有報章引述消息話佢下個月會出任高等法院暫委法官，為期6個月，更係由終審法院首席法... 詳情

【Emily】校友接手新亞飯堂 保留「名物」

【明報專訊】中大新亞書院飯堂上年底因為不敵疫情而結業，噚日新亞書院喺facebook宣布，新亞書院學生及教職員餐廳會喺新學年重新投入服務，中... 詳情

【Emily】林鄭到中學聽施政報告意見 學生望「貓紙」讀問題 包括十四五規劃

【明報專訊】特首林鄭月娥繼續就《施政報告》聽意見，噚日去咗保良局嘅中學，同約800名來自16間學校嘅學生透過視像及親身交流，喺歷時約一小時嘅... 詳情