【Emily】校友接手新亞飯堂 保留「名物」
[2021.09.04] 發表
【明報專訊】中大新亞書院飯堂上年底因為不敵疫情而結業，噚日新亞書院喺facebook宣布，新亞書院學生及教職員餐廳會喺新學年重新投入服務，中標承辦嘅係由一班新亞同中大校友成立嘅「順川飲食有限公司」，餐廳名叫「Now &,」(圖)，老闆之一李健(Kendy)同Emily講，個名嘅意思係當下享受。佢話餐廳會保留「名物」奶水紅豆冰、火腿芝士卷、炸雞髀等，亦會有創新嘗試，包括日式牛肉丼飯。紅豆冰單點12元，跟餐8元。
Kendy話自己係新亞人，讀工商管理，幾個拍檔都係中大校友，大家有同一理念，希望畀中大人好嘅食物質素同環境。佢話繼續會有「頹飯」，晚市供應小菜，有原條蒸魚，希望畀到學生「家嘅感覺」。不過，Kendy話因為疫情，𠵱家啲枱暫時都係兩人或四人枱，佢哋都有保留大枱板，等疫情好啲就可以變番大圍枱喇。
佢話試業4日，對餐廳人流都算滿意，而挑戰係下星期一正式開學後午飯時間嘅人流。
更多港聞
【Emily】林鄭到中學聽施政報告意見 學生望「貓紙」讀問題 包括十四五規劃
【明報專訊】特首林鄭月娥繼續就《施政報告》聽意見，噚日去咗保良局嘅中學，同約800名來自16間學校嘅學生透過視像及親身交流，喺歷時約一小時嘅... 詳情相關新聞
