【明報專訊】電影《國產凌凌漆》中達聞西嘅發明品「太陽能電筒」深入民心，近日有連登網民就發現，馬鞍山一條天橋底安裝咗「太陽能燈柱」，發帖者批評政府「做嘢真係無腦」，有人質疑係咪要喺燈柱上面裝多盞燈，又或者會唔會有監控系統。沙田區議員鄭仲恒(Osman)就為「太陽能燈柱」平反，話其實現時太陽能技術系統已經相對先進，只要附近滲到光，已經能夠着燈，佢仲親自影相，力證燈柱夜晚都會着燈。 「現技術先進 附近滲光就得」 點解會出現「太陽能燈柱」？Osman同Emily講，因為沙田污水處理廠要搬遷，附近一帶地盤由渠務署負責管理，所以燈柱唔係跟一般路政署嘅標準，改為按承辦商嘅概念設置太陽能燈柱。 Osman話，呢種太陽能燈柱嘅成本及維修花費，都較傳統燈柱低，對於網民質疑，Osman就話現時太陽能技術較先進，唔需要太陽光直射太陽能板，只要附近有光滲到已能夠着燈。 Osman又話，政府一直都「唔做唔錯」、唔肯試新嘢，「冇咁醒起太陽能燈柱」，難得有機會見到新意念、有人用創新產品，唔希望因為燈柱喺網上受到批評，就令政府部門冇膽去試新嘢。
|
| |
| |
;){kind=small}
;)
