【明報專訊】全國政協副主席、前特首梁振英(CY)不時喺facebook月旦時政，對於近日海洋公園注資爭議，佢噚日發帖叫南區區議員表態，「海洋公園要還是不要內地客？如果要，如何爭取？」南區區議會主席羅健熙就話，下周四(30日)就有區議會大會，CY可以去旁聽。 CY喺fb發帖，話海洋公園、迪士尼樂園等建設係吸引外地遊客嘅重要賣點，景點未來在於外地遊客會否來港旅遊，佢點名指由立法會議員鄭松泰、毛孟靜開始，「內地遊客對港望而生畏」，反問香港幾時會喺內地宣傳，重塑香港形象。CY嘅帖文引來唔少南區區議員回應，羅健熙反問，遊客對CY而言只有內地客、海洋公園只能迫爆先可以賺錢、香港一切基建只有內地遊客先係王道，「這是不是商務及經濟發展局和海洋公園的立場，是否是100億撥款申請的最重要元素？請他們表個態」。 話CY委孔令成後海園轉虧 田灣區議員袁嘉蔚話，港人對內地遊客望而生畏，反問CY知唔知南區過度發展旅遊業嘅惡果，「你雙腳有冇行過落田灣條街？ 」華富北區議員嚴駿豪提到，當年CY任命孔令成做海洋公園董事局主席，取代盛智文，自此海洋公園由盈轉虧，「南區區議會都好有興趣聽佢解釋」。
|
| |
| |
;)
