【明報專訊】今日中秋節，當然唔少得玩花燈，有網民就上載印有「五大訴求 缺一不可」、「光復香港 時代革命」嘅紙板圖案，等市民可以跟住自製「中秋孔明燈」。呢個「孔明燈」用紙製，裏面未必咁啱放蠟燭，而係畀人唱《願榮光歸香港》等歌曲時，可以放手機燈或LED燈，等花燈可以發光。Emily噚日行經商場時亦見到有人手持「光復香港」字樣嘅黃色「孔明燈」。

今晚各個社區都有不同嘅中秋節活動，例如鴨脷洲風之塔公園有中秋晚會，呼籲南區街坊一齊過節，包括大合唱，同埋叫大家唔好玩熒光棒，改為玩觀星筆；大坑就由噚日至聽日，下晝6點至晚上11點59分實施封路及改道措施，配合大坑舞火龍活動。