【明報專訊】反修例風暴吸引世界各地記者嚟香港採訪，《環球時報》總編輯胡錫進近日亦來港觀察。不過，《環時》周六晚誤報香港眾志秘書長黃之鋒因「參與未經批准集結」被捕，後來發現原來只係「撞樣」，被之鋒質疑「環球網編輯可以被辭退了吧」、「唔好覺得所有四眼短頭髮男性都係我先得㗎」。胡錫進其後喺微博中為其記者道歉，但強調錯誤並非惡意，「是在混亂當中的技術性差錯」，佢自言會為錯誤承擔責任。 「混亂當中的技術差錯」 胡錫進解釋，該報記者喺現場影到其中一名被捕「暴徒」貌似黃之鋒，向兩名現場者求證後，都表示就係之鋒。後來受質疑後，一邊向香港警方求證、一邊刪去原稿，及後獲警方回應話有該名被捕者，但並非黃之鋒。胡錫進提到該名記者長期報道動盪地區新聞，對出錯非常難過。 話示威人數冇佢想像中咁多 另外，港台節目《視點31》噚日請咗作家陶傑同胡錫進對談。胡提到示威人數冇佢想像中咁多，又話非常希望探訪示威者家庭但被拒絕，並不斷批評路透社報道特首林鄭月娥曾請辭係「造謠」，挑撥特首同北京關係，有違媒體道德；強調如果北京發布呢類消息，冇絕對把握就唔會發布。
|
| |
| |
;)
