【明報專訊】反修例風波引發示威連連，示威者喺現場多數會戴口罩保護自己，要認出「真身」都唔容易。有建制派fb專頁上載圖片，話有「疑似九龍城區議員鄺葆賢」嘅示威者，手持雷射筆照射前方。鄺葆賢噚日澄清話「我都想身形有咁靚」，又話最傷心係每個識佢嘅人一見到女示威者張相，劈頭第一句都係話「阿葆邊有咁瘦」。阿葆同Emily講，對該名女示威者感到好抱歉，「要佢變成咁肥、哈比人嘅我」。

話抱歉示威者被當哈比人

話說建制fb專頁「幫港出聲」上載照片，話有疑似鄺葆賢嘅女示威者手持雷射筆直射前方，又引述網民講，如果喺現場嘅真係鄺葆賢，佢就係「顛倒黑白是非、有違醫德」咁話。唔少網民留言聲討，又話要去投訴，又批評阿葆違反醫護專業操守。

阿葆同Emily講，有資深醫生喺社交媒體轉發上述照片，其實朋友都覺得唔似佢，個個一見到張相都即刻話佢邊有嗰個示威者咁瘦，當係笑話一則。

籲勿淡化催淚彈後遺研究

阿葆早前同3名港大醫科生發表催淚彈後遺症研究，佢最希望大家可以睇番份研究，唔好因為小風波而淡化啲數據。