【明報專訊】噚日天文台掛8號波，消費者委員會一年一度嘅消費權益新聞報道獎頒獎禮亦喺風雨中舉行。今年《明報》偵查組同事梁崇碧、羅霈潁同陳浩謙嘅「環聯私隱漏洞」報道，攞到文字組別(調查報道)金獎，絕對係保障消費者權益嘅認同。報道揭發載有超過500萬人信貸資料嘅環聯資訊出現保安漏洞，需暫停有關服務超過半年，至今尚未重開。

今屆消費權益新聞報道獎一共收到274份作品，最終共有28項作品得獎。消委會主席林定國講笑話，出席頒獎禮嘅都係「貴人」，因為「貴人出道，先會招風雨」。主禮嘉賓商務及經濟發展局長邱騰華話，保障消費者權益，除咗有利消費者外，商戶賣好嘅產品，亦能建立品牌形象，香港更會隨之建立良好商譽，希望各界繼續努力。Emily喺度恭喜咁多位得獎同事，希望大家做多啲好古仔，保障消費者權益！