【明報專訊】自由黨榮譽主席田北俊雖然退居政壇幕後，但近日不時為《逃犯條例》修訂發聲，噚日佢就上咗民主黨前主席劉慧卿網台節目《議會內外》，傾偈時仲忍唔住笑卿姐「建制好似好過你哋泛民」，卿姐當然忍唔住反駁，「西環一吹雞你哋咪好囉」，田大少就慨嘆，𠵱家立法會議員「海軍鬥水兵」。
噚日田大少喺節目上問卿姐，民主黨做咩對特首林鄭月娥提不信任動議，「林鄭落咗台，整番(前特首)梁振英咪暈喺度？支持梁振英做呀？林卓廷點搞呀？」佢感嘆當年同卿姐即使政見唔同，都可以傾吓偈。卿姐都感嘆，𠵱家立法會唔同陣營「唔只陌路人，仲仇人呀，郁吓就叫警察」。
田大少聽到就笑卿姐，「泛民仲慘過建制，你哋散到亂晒龍，建制好似好過你哋泛民」，卿姐就即刻反駁「西環一吹雞你哋咪好囉……大家無謂鬥渣啦」，田大少都話雙方係「海軍鬥水兵」，唔知佢哋分別諗起邊個呢？
讚任正非講嘢「一流」
咁到底邊個有能力？田大少談及中美貿易戰時，就忍唔住大讚華為創始人任正非，「任先生講嘢非常厲害，佢應該參政，佢講說話真係一流」。
;)
