【明報專訊】參與旺角大衝突、涉嫌干犯暴動罪棄保潛逃嘅本土民主前線黃台仰同李東昇，獲准留在德國；工聯會會長吳秋北(圖)近日喺facebook批評英美政府干預香港事務，就黃台仰事件亦發聲，怒斥德國嘅偽善無任何底線，聯同美國、英國反華，形容「新的八國聯軍又形成」。 羅健熙：背景係晚清 昏君亡國 民主黨副主席羅健熙喺fb上隔空回應，提醒吳秋北「八國聯軍」嘅背景係「晚清、昏君、改革失敗、義和團、戰敗、亡國」。 陸頌雄叫德領館 開個窗口畀違法分子申庇護 吳秋北批評德國包庇「旺角暴亂首犯」，佢話今日中國已經唔係滿清中國，「再不可欺」，「只搞些低智小動作，再多八強盜國聯軍又如何！」佢仲落咗好多個標註如「#外國勢力低智小動作 #八強盜國聯軍 #外國勢力」，上載咗3張旺角大衝突有黃台仰在內嘅相。 吳秋北發帖，好多支持者留言讚好，工聯會立法會議員陸頌雄就喺會長個post下面留言，提出「另類建議」，叫德國駐港領事館特設窗口處理違法滋事分子申請庇護，又話「好走不送，香港會更好」。 民主黨羅健熙亦出post揶揄八國聯軍論，有網友留言問，如果真係有八國聯軍攻打中共，「唔知呢班保皇黨會唔會精忠報黨，為黨捐軀呢？」羅健熙就回應話，「肯定佢哋第一時間走佬」。
|
| |
| |
;){kind=small}
;)
