【明報專訊】香港眾志成立第四年，噚日公布第四屆常委名單，當中有兩張新面孔，分別係早前因為反對修訂《逃犯條例》闖入政總而被捕嘅何嘉柔(膠柔)及朱恩浩(朱仔)。另外，前副主席袁嘉蔚去年退黨後，今次改選由一向關注教育議題嘅鄭家朗(Issac)頂上，香港眾志主席林朗彥(Ivan)話，Issac會承擔更多重大政治議題上嘅角色。 Ivan透露，膠柔同朱仔都係社工系嘅學生，朱仔曾係學民思潮義工，關注青年組織議題；膠柔都有參與學民活動，直至Ivan、秘書長黃之鋒、常委羅冠聰前年入獄後先加入眾志，對性別、同志平權議題較有興趣。兩名新常委將會加強眾志同學生團體、青年世代嘅連結。Ivan解釋，眾志未來希望同院校學生會、關心時政嘅團體多合作，例如修訂逃犯條例事件，膠柔同朱仔都幫手協調學生會同團體擺街站，希望多鼓勵學界參與社會抗爭。 膠柔、Issac同另一常委梁延豐等人早前成立「沙田一隅」facebook專頁分享社區故事，但Ivan話除咗黃之鋒外，據佢了解眾志其他人無打算出選，「沙田一隅」幾個成員本身都住新界東，如果有朋友需要，都會幫吓手。
|
| |
| |
;){kind=small}
;)
