【明報專訊】俗稱「神沙」嘅硬幣，重要性慢慢減低，金管局收銀車由2014年10月開始，巡迴各區為市民提供免費兌換，市民可以將「神沙」換成紙幣，又或者增值至八達通、電子錢包。截至今年3月，兩架專車共收集到4.6億枚硬幣，可見相當受歡迎。
收集硬幣背後，原來都有唔少故事。金管局貨幣及結算處主管葉小明就話，有慈善團體曾經拎10幾萬善款去兌換，全部都係1蚊銀，一問之下發現，原來該團體喺殯儀館設有收集箱，收集市民嘅吉儀，所以全部都係1蚊銀。
殘缺硬幣送英國加拿大熔解
到底收集得嚟嘅硬幣去向如何？解款職員會將硬幣分類，運去銀行金庫，如果硬幣新淨就會交畀商戶回流市面，有殘缺嘅，金管局就會送去英國、加拿大等地鑄幣廠熔解，將金屬循環再用。葉小明話，咁做可以節省另行鑄幣嘅費用。
;)
