【明報專訊】立法會發展事務委員會前日交代可持續大嶼辦事處嘅工作進度，議員將焦點放咗喺明日大嶼願景，無乜人理會10億元嘅大嶼山保育基金。長春社噚日喺facebook發文，批評政府喺會上用荔枝窩農樂節嘅海報、塱原嘅航拍相嚟講解保育基金項目，但呢兩個地方位處新界東北，跟大嶼山相距甚遠，根本唔適合用嚟做基金配相。

長春社又話，發展局一個唔該都無就攞咗荔枝窩同塱原嘅相去講解大嶼山保育基金，觀感上好似用荔枝窩、塱原保育工作「過橋」，講唔過去。該帖又話唔好怪佢哋小事化大，政府一個PowerPoint嘅處理，其實已經睇到政府對大嶼山嘅保育有幾多承擔。帖文指出，發展局為咗實踐自己制定嘅《可持續大嶼藍圖》，環境及自然保育基金至今批出9個社區參與項目，總金額約900萬元，項目性質與大嶼山保育基金相似，認為發展局講解呢個項目時，引用番大嶼山保育項目會較為恰當。