【明報專訊】自稱係「平凡台灣女孩」嘅57歲台籍政協委員凌友詩(圖)早前喺兩會嘅政協大會上，七情上面發表支持兩岸統一論，引起網民熱論。香港中聯辦主任王志民噚日喺會展出席兩會精神宣講分享會時致辭，就點名稱讚凌友詩，話佢表達咗作為台灣人嚟到香港、再參與兩會嘅心路歷程，代表好多國人嘅內心共鳴，所以凌友詩喺9分鐘發言就引來13次掌聲，形容對方真誠同發自內心嘅感受，值得尊重。

指好多國人內心共鳴

粵港澳大灣區發展係今年兩會香港部分嘅焦點，王志民噚日回應香港「被規劃」、一國兩制「被弱化」嘅講法時，形容呢種講法「完全不是事實」，強調喺大灣區建設中香港佔主角地位，香港唔係被規劃，而係「被關照、被關懷」。佢話大灣區規劃獲得民意支持，尊重民意係社會潮流，如果唔尊重民意、將頭埋喺沙堆，只會被潮流淘汰。

港非「被規劃」 係「被關照」

近期華為孟晚舟事件引起國際關注，王志民演講時不點名提及，無耐之前有「個別國家」，為華為5G喺全世界「做了最大的廣告」，佢話自己同好多朋友都用緊華為手機，為民族科技領先感到自豪，又強調中國喺5G技術屬於引領者，令國際刮目相看，推動人工智能等技術，為經濟發展打開更大空間。