【明報專訊】社福界立法會議員邵家臻一直受糖尿病困擾，噚日佢更喺facebook發相，驚變「獨眼龍」。話說佢噚日朝早喺fb透露自己要「退役一日」，上載手上繫有病人手帶嘅相片，引嚟唔少朋友慰問，幾個鐘後佢就講述事情始末，原來佢檢查後發現糖尿失控，需要即時處理。

本身係佔中案被告嘅阿臻話，「為咗預備4月9號(判案日)可能要入監倉」，佢做咗身體檢查，特別係睇吓糖尿病對身體嘅影響、有無併發症，點知就發現糖尿失控、膽固醇超標，要認真處理。佢噚日就要處理糖尿上眼，阿臻話病理上叫黃斑水腫，需要打眼底針消腫丶放水丶減壓。噚日起嚟緊3個月都要打針，佢形容雖然唔知下個月係咩環境，但都打住先。

阿臻喺病之餘亦不忘輕輕放閃，話「謝謝愛人的照顧」。

糖尿病影響阿臻已唔係第一次，當年喺佔領運動期間，佢就曾經因糖尿病影響令致小腿急性發炎，要入院治療。