【明報專訊】前日係跑馬地傳統名校聖保祿中學中六生嘅last day(最後上課日)，同學仔固然想喺校內影多幾張相留念，過咗校方安排嘅指定拍攝時間，有同學仔繼續喺校內影相，至學校黃昏關門後，又喺校門外玩，包括坐馬路同欄杆，有老師路過叫佢哋咪太嘈之餘，仲因應學生行為報埋警，結果呢個last day就真係玩到好大，令師生都夠晒難忘。
警方回應話前日確係收到有報案，有20名學生阻塞跑馬地雲地利道一學校外嘅行人路，警員到場後，學生自行散去。
有學生喺Instagram對校方安排表達不滿，話有老師喺放學後要求學生離開班房同操場，唔准佢哋影相；學生轉移「陣地」到校門時，又畀人話「阻街」報警。
校方：老師勸歸家無效 擔心報警
校方噚晚出聲明回應事件，話有老師當時勸喻學生歸家無效，其中一個老師擔心學生安全，一時情急私下報警求助。校方一方面就事件對鄰舍、道路使用者及警方造成影響深表遺憾，亦會檢視中六學生最後上課日嘅拍照安排，及「嚴正」向報警老師講不應喺未得校方授權下，急於報警。
;)
