【明報專訊】前年施政報告提出嘅「公共交通費用補貼計劃」，聽日可以領取補貼，市民只要去港鐵站等地設置嘅「八達通輕拍閱讀器」拍一拍卡，就可以拎番1月份嘅補貼。雖然唔少議員都未必會搭公共交通工具，但Emily打聽下亦發現，原來部分人都可以拎到津貼。好似自由黨鍾國斌(Felix)，雖然佢做老闆亦有私家車，但原來佢幾乎每日都會搭公共交通工具！ Felix話自己平日先由西貢嘅屋企搭綠van出港鐵站，再轉港鐵返金鐘立法會開會，中間又會再去佢喺長沙灣嘅公司，基本上每日都會過海4次。不過佢1月曾經出埠，1月份公共交通工具車費係594蚊，可以拎到48.5蚊補貼。他估計如果成個月留港，可以拎足300蚊補貼，「金額都算合理，一般打工仔每月慳300蚊，都夠食一個禮拜lunch」。 成日搭東鐵 阿廷拎到192蚊 民主黨林卓廷(阿廷)家住沙田，平時會搭巴士轉港鐵去立法會開會，本身係新界東立法會議員及北區區議員嘅佢，成日搭東鐵線周圍去，佢上月嘅公共交通開支有1167蚊，可以拎到192蚊補貼，相信喺議員入面都算好多。 至於交通事務委員會主席、民建聯陳恒鑌話，佢平時會視乎行程，如果少嘅就會搭公共交通工具，如果行程多，就會揸私家車，所以上個月嘅公共交通開支未夠400蚊，拎唔到補貼。佢話以後會搭多啲公共交通工具，希望可以拎到補貼。
|
| |
| |
;)
