【明報專訊】民主黨主席胡志偉、副主席尹兆堅及羅健熙平時官仔骨骨，煮起餸上嚟都相當有功架。話說噚日民主黨中委搞傳媒團拜，3人即場下廚煮番幾味，分別煮咗蘿蔔糕、黃金蝦及椒絲炒魷。Emily見到阿尹即場切蝦、挑腸，相當熟手；志偉煎蘿蔔糕就最快整好，Emily試過味，覺得都相當好食。

三味餸各有名堂同寓意，志偉整嘅蘿蔔糕名為「長者年齡唔好推糕(高)」，係回應緊政府早前將長者綜援申請年齡上調至65歲一事，強調要長者就業唔應該調高長者綜援年齡，而要用鼓勵方法。阿尹整嘅黃金蝦就名為「老人家都敢蝦」，呼籲政府唔好再欺負老人家啦。

羅健熙整嘅椒絲炒魷名為「紅椒司炒魷魚」，寓意要律政司長鄭若驊下台。羅健熙又即席揮毫，寫揮春獻畀鄭司長——「僭建枉法鄭若驊 早日歸去救香港」，寫完仲即刻貼喺鄭若驊紙板公仔上，話好似以前啲「罪己詔」咁呀。