【明報專訊】大年初一花車匯演係農曆新年重頭節目，旅發局宣布下周二會有9架豬年主題花車巡遊，花車比往年大架，其中一架直情好似雙層巴士咁大，而且今年有啲花車相當Hi-Tech，安裝咗聲音感應器，車上燈光效果會因應現場喝彩聲而變，可以同觀眾互動；亦有花車造型係高鐵同懷舊美食街。

除咗花車，當晚8點仲有25支國際同本地表演隊伍，喺尖沙嘴文化中心廣場出發，經廣東道、海防道同彌敦道，一路表演到喜來登酒店。

今年花車匯演主題係「開年、開運、開心」，旅遊發展局節目及旅遊產品拓展總經理洪忠興話，星光大道重開吸引到好多市民，估計好多人會順道欣賞花車匯演，預計會吸引到大約15萬人次。