【明報專訊】有「港鐵吉祥物」之譽、人稱「基哥」嘅港鐵車務營運主管李聖基，喺港鐵工作咗30年之後，今個月底將會退下火線退休喇！網上仲有消息話基哥只做到呢個月20號，唔少基哥fans包括Emily聽到都覺得好突然同唔捨得。 Emily噚日同基哥傾開，證實佢月底退休，佢仲話好感謝市民同傳媒朋友一直以嚟嘅支持同意見。佢話自己今年已經62歲，過咗要退休嘅年齡，係時候畀自己「停一停，休息一下」先。 想以其他角色貢獻港鐵 大家除咗成日喺港鐵見到基哥嘅卡通紙板公仔，應該亦留意到基哥成日被傳媒「扑咪」，講解大大小小嘅鐵路事故。基哥就話，即使佢退休，始終自己喺鐵路呢行做咗咁多年，如果第日港鐵有需要，佢都希望睇吓用其他角色繼續貢獻港鐵，「大家都希望鐵路服務繼續做得更好」。 翻查資料，基哥當年喺理工就讀土木及結構工程，唔少港鐵線包括荃灣線、觀塘線、將軍澳線等佢都有份參與建造，今年初港鐵準備高鐵香港段9月通車，亦都特登調派基哥睇實高鐵試營運同埋車務維修等，最後如期9月通車，至今運作都大致暢順，相信基哥可以放下心頭大石。Emily在此謹祝基哥退休生活快樂，人生新一頁更加多姿多采！
|
| |
| |
;){kind=small}
;)
