【明報專訊】人民力量陳志全(慢必，圖)早前喺立法會提出議員議案，促請政府研究制訂讓同志締結伴侶關係嘅政策，最快今日討論。慢必噚日向記者介紹議案，承認通過機會好微，但仍希望透過議案令政府回應，並讓議員開放討論。本身係同志嘅慢必強調，缺乏同志政策會令法律缺乏一致性，笑言自己現時單身，但即使將來有個「大地產商老公」，都未必要向立法會申報利益，正正反映政策漏洞。

議員議案要獲地區直選同功能組別分別過半數議員支持先獲通過，慢必預料議案喺大部分建制派反對下會被否決。一向對同志政策有保留嘅經民聯梁美芬，早前就慢必議案提出修正案，要求政府維護一男一女婚姻制度，被慢必批評完全違背議案原意。

不過，慢必話已游說新民黨葉劉淑儀同個別民建聯議員唔支持梁美芬修正案，慢必相信如果民主派到時坐齊人，「理論上抵擋到」梁美芬嘅修正案。慢必強調，議案並非聚焦同志婚姻或民事結合，只係希望討論政府如何處理同志政策。同場嘅公民黨黨魁楊岳橋亦形容，同志政策無分黃藍，亦非關乎一國兩制，而係從人性出發，希望建制派議員支持慢必議案。