【明報專訊】民主黨反對廣深港高鐵香港段撥款同喺西九龍高鐵站劃出內地口岸區實施一地兩檢，高鐵香港段同港珠澳大橋近月相繼開通，民主黨沙田區議員吳錦雄就搞?個兩日「街坊團」，標榜「一次過去晒兩個基建」，12月中由香港出發經港珠澳大橋去珠海，遊覽埋順德之後，回程喺廣州南站坐高鐵「直達香港」西九龍站。 工聯會離島區議員鄧家彪噚日喺facebook上載咗呢個團嘅宣傳海報，揶揄民主黨「急民所急，想民所想！一次過去晒兩大基建，擁抱大灣區一小時生活圈」。 鄧家彪讚「急民所急」 吳錦雄同Emily承認，黨內有提醒過「盡量唔好搞呢啲團」，不過佢認為黨友喺立法會內已經表達咗反對意見，而呢啲基建已經上晒馬、完成埋，一般市民都想見識下，認為搞活動畀居民消閒，同民主黨立場無衝突，反問「民主黨都反對東大嶼填海，唔通第日填完之後又唔去咩？」佢又話有啲團體喺侍產假問題上都「講一套做一套」喎。 認黨內有提醒盡量唔好搞 吳話如無意外會親自帶團，到時會親身喺西九龍站內體驗一地兩檢，「都好驚㗎」。佢又話呢個街坊團好受歡迎，但承認宣傳出街後黨內有人提醒佢應該低調啲處理，例如搵居民協會主辦，佢都認為「係需要小心啲嘅」。 工聯會立法會議員陸頌雄之後喺fb轉載咗鄧家彪個帖，話兩大基建方便，連民主黨都「like」，佢仲好細心咁留意到民主黨張海報用咗台灣高鐵(700T型)張相，質疑「似乎唔太專業噃？」
|
| |
| |
;){kind=small}
;)
