【明報專訊】前財政司長曾俊華前日不點名提到某些議員喺立法會開開吓會做facebook live，仲要做埋好幼稚嘅鬼臉，「好似Pre-school(學前)嘅班房一樣」；議員何君堯對號入座，仲做fb live同發帖文回應，質疑曾俊華係咪「懵上心頭」，將啲小事放大，反問「如果認為拍fb live不可接受，似乎搶手機應該要去槍斃」。 對於被曾俊華不點名嘲諷，何君堯話「與有榮焉」、「受寵若驚」，「原來何君堯芝麻綠豆噏嘅事，佢都睇得咁認真」。佢反駁話自己只係喺立法會內「同記者一起扮演第四公權」，拍攝泛民搗亂議會嘅過程同醜態。 何君堯話，曾俊華曾幾何時都批評過民主派議員係「盡情破壞」香港嘅人，𠵱家就調轉批評嗰啲撥亂反正嘅人係破壞者，「不禁令人懷疑，究竟係佢(曾俊華)變得糊塗，還是佢本質就係如此呢？無論怎樣，我哋慶幸佢做唔到特首，否則香港嘅穩定繁榮危矣」。 曾俊華喺2015年做緊財政司長時曾經撰文期望議員善用時間，唔好「拉布」，否則只會「彼此也在捱」。當時立法會審議緊《財政預算案》，佢希望議會可以有效率地審議。
|
| |
| |
;)
