【明報專訊】立法會噚日設午宴款待約40名現任同前任議員，席間民主黨林卓廷重遇就讀中大政治與行政學系時嘅恩師、立法局前主席黃宏發(發叔)。阿廷笑住爆料，話發叔當年可能因為立法局公務繁忙，不時走堂，成日喺課室外貼通知寫住「有要事，下次補堂」，加上學生本身都走堂，惡性循環下，試過原定過百人上嘅堂，只有佢同發叔現身，最後兩人轉去飯堂撐枱腳。

立會宴新舊議員

被記者問到當年往事，發叔笑住話「無走堂喎」，但就承認成日去飯堂同學生上堂。噚日撞正發叔74歲生日，佢依然精力充沛，喺記者採訪區企足30分鐘講《議事規則》，中氣十足，阿廷事後亦好識做，幫恩師斟水飲，再送對方離開。多名不同黨派嘅前朝議員噚日都有出席，包括霍震霆、蔡素玉、林貝聿嘉、劉慧卿同張文光等。