【明報專訊】負責協調民主派出戰立法會補選嘅民主動力，噚日舉辦民主派新界東初選論壇，新民主同盟范國威(Gary)、工黨郭永健同獨立張秀賢喺互相質詢環節「泥漿摔角」，31歲嘅郭永健形容自己有活力，但隨即遭玩開拳擊嘅Gary下戰書，建議「比併掌上壓」，比較吓邊個更有活力，郭永健就反駁「我橫又橫過你，高又高過你」。呢段舌戰引嚟現場一片笑聲，最後張秀賢打圓場，建議搞番個民主派陸運會，畀大家強身健體咁話。 本身係上屆立法會議員嘅Gary強調，議會抗爭要有活力，被抬走時亦要技巧應對。工黨新主席郭永健話，早前工黨喺抗議特首林鄭月娥嘅行動上，自己成功衝到去林太座駕，差啲開埋車門，最終逼到林太接請願信，呢種就係活力表現。佢話自己多次被人抬，但唔使降格到「上擂台打拳」，因為呢個係激進派先會採取嘅策略。 張未回應有無獲青政支持 今次新界東補選議席原屬於青年新政梁頌恆，三人噚日被問到有無獲得青年新政支持參選，Gary同郭永健都斬釘截鐵話無；張秀賢未有正面回應，只係話參選人應該獲青年新政同本民前認可同接受，有「朋友」同佢講過佢係可接受人選，但未提供青政支持佢嘅證據。
|
| |
| |
;)
