【明報專訊】勞工及福利局長羅致光(CK)上星期到柬埔寨訪問3日，跟進安排柬籍家傭來港工作嘅籌備情况，佢噚日發表網誌總結行程之餘，亦發表「食評」，話第一晚飛抵首都金邊時，食咗一餐當地著名嘅柬埔寨菜，令佢留下好好嘅印象。CK話自己唔嗜辣，所以柬埔寨嘅酸湯比泰國冬蔭功更啱胃口，以芭蕉花做嘅沙律好有特色，燒雞亦好啱中國人口味。

訪柬國 跟進家傭來港

CK話，佢同喺當地工作嘅香港人傾偈，問到香港各地美食都有，但點解好似無柬埔寨菜？對方就回應，話可能喺香港識整柬埔寨菜嘅人唔多，又或者柬埔寨菜同好多東南亞菜相似，無明顯特色。CK就話，正因為柬埔寨菜融會咗多種香港人慣常嘅口味，因此自己試生平第一餐柬埔寨菜，完全無適應困難。

CK又話，當地好多建築物同店舖招牌，都有中文、英文同高棉語3種語文，當地官員同佢講，柬埔寨人語言天分高，對方相信柬埔寨傭工來港要融入華人社會生活習慣，問題應該不大。