拒評教聯《中國模式手冊》 蔡若蓮：入教協早過入教聯

拒評教聯《中國模式手冊》蔡若蓮：入教協早過入教聯

[2017.08.10] 發表

【明報專訊】新任副教育局長蔡若蓮返咗工一個禮拜，噚日佢同傳媒聚會時，有行家提起坊間有團體成日翻舊帳，講2012年教聯會出版嘅《中國模式國情專題教學手冊》，用「進步、無私與團結」形容中國政府；蔡若蓮一聽到就劃清界線，話佢已經退出咗教聯會嘅理事會，所以唔會評論教聯會嘅嘢，又話無理由做會員就要承擔個會出嘅嘢喎。佢仲話自己都係教協會員，加入教協仲早過加入教聯會！

50歲嘅蔡若蓮話自己1988年已經加入教協，到𠵱家都仲係教協會員，好多年前仲喺教協報發表過文章；至於佢曾經擔任副主席嘅教聯會，係到2000年代因為參加工聯會攝影班先加入。蔡副局仲話，會約教協立法會議員葉建源見面，但葉建源唔喺香港，要等佢返嚟再安排。

教局教材偏頗？蔡：總有改善空間

唔再係蔡副主席、唔講教聯會，咁Emily就問番教育局早前出嘅「憲法與《基本法》」教材，當中話街頭抗爭「只反映了一部分香港人民主意識的粗糙和膚淺」，被質疑偏頗，引起風波。蔡副局長回應話，任何教材都會有改善空間，話如果「驗屍咁驗」，當然會搵到「逗號唔啱」或者比喻可以更恰當等事例，又話大家可以提意見，但相信教育局同事同前線老師已經好努力、好認真咁合作做好份教材。

被質疑主要任務係推國民教育，蔡若蓮話國民教育一路都做緊，各間學校都有自己嘅方法，佢會用平常心處理，而且國民教育都唔係現屆政府嘅優先項目，會先做好投放36億元教育新資源嘅工作，而目前局長楊潤雄畀佢嘅任務，係做好推行免費幼稚園教育嘅工作。