【明報專訊】公務員事務局長羅智光近日不時去唔同政府部門參觀，以及同公務員見面交流，噚日羅智光就同一班喺政府部門做暑期實習嘅殘疾大學生見面，原來今年政府請咗來自7間本地大學共32個殘疾大學生，佢哋獲安排到15個決策局同部門實習8個星期。

呢個計劃上年推出，等殘疾大學生可以喺正式投入職場前汲取實際工作經驗，做好準備，羅智光話亦可令政府部門同事親身了解殘疾人士嘅天賦同潛能，由於參考上年計劃嘅實習生反應正面，所以政府今年增加咗名額。佢話呢個計劃同其他政府實習計劃唔同，部門會安排同事擔任學生嘅導師，協助佢哋適應工作環境、應對問題等。

其中一名實習生曾漪懋主修英語教育，獲分派去公務員事務局法定語文事務部協助翻譯文件，佢認為只要有適當協助，殘疾人士同樣可以勝任唔同崗位。佢嘅導師黃鵬馨讚賞曾漪懋工作態度積極認真，認為身體殘障完全無影響其工作能力。