【明報專訊】近日市民都關心被「棕櫚硬脂」污染嘅多個海灘情况，另一邊廂，網民Paul Ng Ching喺fb群組「香港行山遠足之友(聊天吹水專區)」發帖，話前日同幾個年輕人去西貢沙灘玩樂兼清垃圾時，喺廈門灣約兩米深水底發現一個「鐵籠」，細睇原來係一架超市手推車！佢又指一半車身已埋喺沙下，當時戴住手套同潛水鏡嘅佢將手推車撈上水面，同行年輕人亦有配備潛水鏡同籃，清理海面其他垃圾。

Paul Ng Ching回覆Emily查詢時話，今次係第3次清潔沙灘，主要喺淺水區清理漂浮物同水中見到嘅垃圾，前兩次只有佢同囝囝參與，今次多咗朋友嘅兩個小朋友。佢話，基本上會喺防鯊網內嘅淺水區來回清理一次，然後先玩。今次搵到嘅惠康超市車，係佢同阿仔玩樂時喺水底發現嘅，打撈後搬到救生員救護站交畀佢哋處理。

其他網民大讚佢嘅行為，又紛紛猜測點解會有超市手推車出現。《簡易程序治罪條例》寫明海上棄置廢物罰則，違者可被判罰款1萬元同監禁6個月。