【明報專訊】西營盤老牌扒房森美餐廳嘅創辦人葉聯曾經喺立法局下廚20年，由麥理浩年代做到彭定康離港，成為立法局「御廚」。不過因為業主加租，現時舖位做到9月15日就約滿，目前仲搵緊地方重開餐廳。

葉聯起初喺酒店廚房負責洗煲，及後就跟大廚學煮西餐，之後自立門戶，開咗以自己英文名Sammy命名嘅森美餐廳。由於佢廚藝了得，加上態度誠懇，時任立法局議員張奧偉搵佢去立法局煮嘢食，於是佢就開始為立法局提供到會服務。

葉聯擅長煮多款醬汁，廚藝連英國前首相戴卓爾夫人都讚。1982年立法局議員宴請訪港嘅鐵娘子，當時葉聯煮咗羊架做主菜，戴卓爾夫人食嘢時，親自問佢點解煮得咁好食。

現年87歲嘅葉聯已經將餐廳業務交畀子女管理，女兒葉鳳儀話港鐵西營盤站通車後，多咗人搭車出區外食嘢，令餐廳客人少咗；加上業主加租至逾12萬元，下月中約滿會暫時結業，目前搵緊地方重開餐廳，希望可以跟番原有風格裝修。