【明報專訊】政府近期落力hard sell高鐵一地兩檢嘅好處，之前喺政府新聞處facebook上載圖片，話坐高鐵由香港去廣州，喺唔停中途站下車程只需48分鐘，但坐飛機就要60分鐘，而且仲要提早一兩個鐘到機場，被唔少網民批評誇大失實。原來機管局喺2011年力推目前造價高達1415億元嘅第三條跑道項目時，就曾引用顧問研究，證明坐飛機去內地大部分城市都比高鐵快，當中更話如果到北京、重慶、成都等大城市，高鐵對比飛機完全「無競爭力」。 政府於上周二公布一地兩檢方案後，近日係咁打民意戰，力銷高鐵嘅交通同經濟效益，港鐵主席馬時亨日前亦話如果高鐵有一地兩檢，佢去北京嘅話「一定會乘搭高鐵，不會乘搭飛機」。 新民主同盟區議員譚凱邦噚日就搵番2011年機管局力推第三跑工程上馬時嘅諮詢文件，當時機管局引用顧問公司同運房局數據，比較咗香港前往16個內地城市嘅車程，當中證實咗10個城市係坐飛機比高鐵快，文件仲列明其中5個城市，包括北京、重慶、成都、西安同昆明，對比飛機「高鐵無競爭力」。至於坐高鐵快過飛機嘅城市就有汕頭、長沙、南京、廈門等。 譚凱邦批評政府離譜，「機管局推銷三跑時，就話長途高鐵冇競爭力；而林鄭7月9日參觀石崗高鐵停泊處時，就話搭高鐵去上海、北京好方便，咁邊個先岩(啱)？」
|
| |
| |
;){kind=small}
;)
