【明報專訊】梁國雄(長毛)、劉小麗、羅冠聰同姚松炎因為宣誓覆核案被法庭裁定喪失立法會議員資格，4人無因此放棄政策同民生工作。其中阿聰一直跟進海怡半島港鐵站喺7月發生嘅自動梯事故，機電工程署近日都有回覆阿聰嘅查詢，但就稱呼佢做「羅冠聰先生」，唔再用議員稱呼。

跟進海怡站炒梯 羅稱初心不變

阿聰喺facebook話，即使係「羅冠聰先生」，都會繼續跟進市民關注嘅議題同地區事務，強調「一直以來都履行誓約，為香港為市民服務，初心不變」。

長毛一連兩日出席立法會公聽會，佢噚日以「社民連梁國雄先生」身分出席「長期護理政策聯合小組委員會」，就資助長期病患者買昂貴藥物嘅政策發表意見。長毛斥政府減紅酒稅等「富人稅」，但就對貧病交煎嘅長期病患者毫無惻隱之心，怒斥政府遲遲未有資助嘅路線圖同時間表。長毛仲同政府講：「你唔好以為DQ咗啲議員就無人監察你，仲有人！佢哋(病人組織)就係監察你。」