【明報專訊】立法會發展事務委員會今個星期五會去廣東考察東江水供水系統，社民連議員梁國雄(長毛)已經成功拎到一次過回鄉證，會隨團考察。至於會唔會著「六四」圖案上衣，長毛無正面回應，重申以前著六四衫都可以過關返內地，「每次內地都有唔同政策」，並強調今次係以「考察東江水嘅心態」上去。 「考察東江水心態返內地」 長毛噚日喺立法會見記者時，不斷被問會唔會著六四上衣，同會唔會有考察以外嘅行動或者約見內地人士，長毛話𠵱家都未知可唔可以入境，又點會事先約人。長毛話：「見到中央官員先會講六四問題」，指自己2005年成功北上，仲喺見時任廣東省委書記張德江時提出要平反六四。 東江水考察團為期兩天，有19個議員報名，包括8個民主派議員，發展局同水務署也有約10個官員隨團。行程包括了解輸港東江水運作系統、監控同保護輸港東江水水質嘅設施，以及沙灣河流域水環境綜合整治工程嘅進展。
|
| |
| |
;)
