【明報專訊】前政務司長林鄭月娥以777票當選新特首，立法會前主席曾鈺成過去不時提出中、英、數題目畀讀者估吓，上年7月就有一條數學題，仲話預示咗下任特首名字，曾主席噚日就喺專欄話，當時已預視林鄭月娥當選。 上年7月、即林鄭月娥去年底指有「巨大變化」不得不重新考慮參選之前幾個月，曾鈺成喺《am730》專欄拋出數學題，指下任特首個名係30畫。當時唔少人猜測有邊個人嘅名字有30畫，而喺當時熱門人選特首梁振英、時任財政司長曾俊華同曾鈺成中，只有梁振英「中選」。不過曾鈺成之後話，中文字筆畫不止有一個算法，謎底未解。 隨住選舉結果出爐，曾鈺成噚日喺《am730》專欄拆解呢條數學題，指「3名行政長官候選人中，只有『林鄭月娥』這名字，用簡體字寫出來，剛好30劃」。這意味曾鈺成於林太稱重新考慮參選前，已經預視到佢會當選。 曾鈺成又提到3個月前提及詩句「望湖樓下水如天」，並話解通此句，便知誰是下任特首，「此句描述的情景，正是『水靜鵝飛(成語為水盡鵝飛)』。鵝(娥)果然飛起來了，水卻沒有靜下來」。
|
| |
| |
;)
