【明報專訊】喺立法會金句多多、製作好多道具嘅工聯會王國興未能連任議員，但佢話要對市民不離不棄，或者會成立新平台監察立法會同政府，睇嚟大家未來日子仲可以見到佢。而退下火線嘅自由黨田北俊就話離開議會「梗係開心」。 王國興噚日喺商台節目《在晴朗的一天出發》中表示，好記住有23萬選民投過佢一票，考慮成立新平台監察立法會同政府，話要回報選民，對大家有交代同承諾。佢仲講笑話主持人提議用其票數「233236」做組織名都唔錯。 至於經典道具，例如午餐肉、鉸剪仲會唔會見到呢？王國興笑言「相信好難」，過往有議員身分，可以喺議事堂展示膠鉸剪及午餐肉，無咗身分就好難喺議事廳發聲。 曾主席﹕唔連任係一生最明智決定 田北俊接受立法會主席曾鈺成主持嘅商台節目《鈺成千里目》訪問時，一開始就問曾主席幾時做咗名嘴，曾主席就話自己無嘢做，就走咗嚟電台開咪。曾主席問田少離開議會開唔開心，田少即刻答「梗係開心啦，主席你做嗰時已經咁喇，嘩，𠵱家睇睇，40(建制派議員)對30(非建制派議員)，換咗嗰班仲惡過走咗嗰班，我諗坐喺度，真係有排煩呀！」 曾主席都忍唔住笑出聲，話「早幾日同啲朋友傾偈，我話，可能一生人最明智嘅決定就係呢次，唔繼續再競選連任」。
|
| |
| |
;)
