【明報專訊】今年舉行嘅國慶煙花匯演將於下月1號晚上9時喺維港上空上演，到時會出現3D圖案，市民喺唔同位置都可以清楚睇到，唔會好似平面圖案走晒樣。 製作公司行政總裁毛偉誠話，今次煙花製作難度最高係第7幕嘅《海之歌》，要喺空中營造海洋生物飄浮嘅效果，當中會以3D水母配合2D浮游生物；第3幕《春之圓舞曲》中嘅「四片花帶櫻花芯」圖案亦係新推出，市民要落足眼力；第5幕《火之舞》係滿族傳統舞蹈，煙花會喺空中快速旋轉，營造出「旋龍」效果，猶如龍騰躍於人前。 匯演全長23分30秒，分為《黃河上游》、《獅子山下》、《春之圓舞曲》、《功夫》、《火之舞》、《我的驕傲》、《海之歌》及《黃河下游》8幕，3艘躉船發放共23,888枚煙花。匯演由海南省港區政協委員聯誼會獨家贊助，耗資800萬港元。贊助商話當晚會喺會展設晚宴，邀請400名低收入家庭人士及學生出席。 停辦咗兩年嘅國慶煙花去年復辦但鬧出風波，原定有一幕紀念抗戰勝利70周年，配以警報聲模擬當年情景，但消息一出即惹爭議，主辦單位最後決定取消模擬警報聲。
|
| |
| |
;){kind=small}
;)
