「民望高」談CY民望低 「特首唔怕做醜人」
[2016.07.09] 發表
【明報專訊】梁振英政府班子中，食物及衛生局長高永文長期為民望最高局長，被戲稱為「民望高」，但邀請佢做局長嘅特首梁振英(CY)嘅民望持續低迷，高永文就解釋話因為「特首唔怕做醜人」。
高永文喺商台節目《雲常開》談及4年局長生涯，佢話CY當選後親自邀請佢做食衛局長，但自己並非立即答應，又形容係唔容易決定，「向前向後都要考慮」：「向後」係考慮到手上病人點處理，「向前」則要考慮自己有否條件做政治人物，「無100%信心」。
高局長讚CY有「比較實在」嘅說法，「佢有興趣做就表示有興趣」，透明度較高，又認同梁對社會公義問題嘅睇法，現屆政府傾向左派，為咗達到社會公義，政府會作出干預。
對於自己民望高，但CY就民望低，高局長話任何團隊內「有人要做好人，有人要做醜人，特首唔怕做醜人」，但唔可以「吓吓扮好人」，有啲情况下要堅持。至於如果CY連任，咁高局長又會否留任呢？佢就回應話「今日唔講」，又話有興趣重拾臨牀專業工作，但唔覺得係時候宣布係咪尋求連任、抑或尋求其他委任或選舉。
更多港聞
相關新聞
