【明報專訊】投注額逾3.5億 歷來第二高

全城關注嘅1.5億元「超級六合彩」噚晚攪珠，唔少市民連日嚟都幻想中咗頭獎之後可以劈炮唔撈，買車買樓兼環遊世界等等，呢幾日大家喺食飯前放工後都衝到各區投注站，特別係被稱為「最幸運投注站」、曾經賣出42張頭獎彩票嘅中環士丹利街馬會投注站，更加擠擁到水泄不通。馬會話今期投注額錄得超過3.5億元，創咗六合彩史上歷來第二高投注額嘅紀錄；至於派彩方面，頭獎有2注中，每注派彩84,659,780元，係六合彩史上第三高嘅彩金。

重點係，馬會話頭獎兩注之中，原來有1.5注來自網上或電話投注戶口，簡單講，大家以後或者唔使去投注站排得咁辛苦，不如諗吓點樣搵部幸運電腦或手機落注好過。

頭獎彩金史上第三高

今期二獎有9.5注中，每注派1,880,270元。睇番馬會紀錄，原來最高嘅頭獎派彩紀錄出現喺2013年12月10日，1注獨得超過9000萬元，可惜呢啲機會唔係Emily嘅，聽日都係準時返工算罷喇。