【明報專訊】噚日係清明節,亦係兒童節,特首梁振英喺facebook上載相片,話噚日喺禮賓府接待超過100個中小學生、家長同老師,分享吓種植、處理廚餘和綠色廢物經驗,CY又同班小朋友一齊種嘢,又送盆栽畀班小朋友。
CY話,好欣賞同學年紀小小,已識得同有需要嘅人分享自己嘅收成。佢又勉勵同學話,「種植是學習耕耘、收成、珍惜和分享的過程,得到的經驗對同學成長和建構一個健康和諧的社會非常有用」。睇CY上載嘅相片,相信今次呢個閉門活動,菁英會同梁粉網站「港人講地」有份負責,因為相中可見,菁英會唔少骨幹,好似創會主席施榮忻、主席盧金榮、前主席白富鴻等都有出席,港人講地總編輯張瑞蓮,以及日薪過萬嘅新聞統籌專員馮煒光亦喺現場。