【明報專訊】亞視嘅免費電視牌照下月1號屆滿，59年老店或將成為歷史，亞視已故前主席邱德根個仔邱達昌，接受香港電台訪問時，就話覺得亞視𠵱家畀人印象好亂，「今日亞視邊個係老闆我都搞唔清楚」，又感歎如果爸爸仲在生，見到亞視𠵱家嘅情况會好失望。
邱達昌話，自從王征入主之後，亞視節目質素變差，又話亞視由阿爸掌舵嗰陣，收視曾經好風光，其後嘅老闆雖然都做得唔錯，但相信爸爸係唯一一個幫亞視賺到錢嘅。
邱達昌又透露自己曾想做亞視「白武士」，年幾前同王征傾過，但失敗告終，「我有我遺憾，但王生係老闆」。邱達昌上年牽頭成立永升亞洲，打算申請免費電視牌，報道話邱達昌本來預計今個月有結果，但政府喺幾個禮拜前要求佢哋再補交文件，見𠵱家「一台獨大」，佢希望政府盡快決定係咪發牌。
;)
