【明報專訊】新民黨主席葉劉淑儀上星期著咗件紅色皮草大褸現身立法會，話皮草來自養殖嘅mink(貂皮)，形容穿皮草「同食牛肉一樣」，引來愛護動物組織狠批。噚日立法會大會葉太已經無著皮草，改穿鮮紅色大褸，但葉太都話天氣凍搞到流鼻水。上周見到葉太著皮草嘅黃毓民，噚日路過又再笑葉太，問係咪無著mink所以流鼻水。

另外，香港毛皮業協會噚日喺本報刊登全版聲明，話要反駁近日有團體對行內嘅批評。聲明強調業內都係反對虐待動物，呼籲若有人發現有毛皮動物被虐待，並可提供確實嘅證據，協會一定會將個案交畀執法機構處理。聲明仲提到「皮草作為一種環保及可持續性的服飾材料」，目前世界有約70%嘅時裝都可以搵到皮草設計，可見業界多年嘅教育和推廣「已越受認同」。

動物地球﹕人皮係咪都算環保

動物地球總幹事黃繼仁反駁協會，認為一個商業協會要去到出聲明，證明行業係夕陽工業。黃繼仁亦質疑協會形容皮草係環保材料，係將天然物料等同環保，旨在轉移視線，反問人皮都係天然物料，咁係咪都算環保。

協會將喺月底舉行年度嘅香港國際毛皮時裝展覽會，黃繼仁話到時動物團體會到場示威，「前所未有嘅大規模」，但目前難以估計人數。佢更表示屆時可能會嘗試衝擊會場，希望讓公眾了解更多真相，對皮草商施壓。