【明報專訊】近日TSA(全港性系統評估)議題鬧得熱烘烘，仲令一眾家長團結力爭取消小三TSA。早前畀某部分家長話「抽水」嘅立法會教育界議員葉建源，其實對TSA一直有研究，佢最近仲「循環再用」，將自己喺2013年出版嘅《全港性系統評估(TSA)評論文集》重新增訂，加入今年嘅TSA調查報告同埋新評論文成書，定價40蚊。 葉建源話，「2013年喺立法會上提出TSA，好多議員都唔知係乜，但到今年，議員都明咗好多」，加埋近排社會討論多，所以本書揀呢個時候推出。Emily睇過目錄，除咗有評論文章，仲有學者嘅學術研究，同埋教協、香港數學教育學會同官方嘅觀點。葉建源今日又會舉辦一個「學者辯論TSA論壇」，請咗中大何瑞珠教授、教院馮振業教授同埋「對手」中大侯傑泰教授，幾個大教授立場對TSA存廢立場唔同，今日肯定又有一場激烈辯論。 聽日就係區選，facebook專頁「爭取取消小三TSA」就建議家長，投票畀支持取消小三TSA嘅區議會候選人。專頁其中一個發起人金怡寧話，「係做畀政府睇」，仲話唔會投畀「連撐取消TSA都不敢講的候選人」。佢強調要考慮埋候選人嘅其他政綱。
|
| |
| |
;)
