【明報專訊】中大學生近排行上新亞書院，會突然發現新亞巴士總站嘅「小百萬大道」(即通往錢穆圖書館嘅廣場)入口，多咗個兩三層樓高嘅花牌，有成8米闊，橫跨整條「小百萬」，驟眼睇以為新亞變咗新界圍村打醮！

Emily睇真啲，花牌中央4個大字寫住「張佬大壽」，原來今年係中大新聞與傳播學院50歲生日，因此學院今日就搞大型慶祝活動，廣邀校友由朝玩到晚。

Rubberband方健儀表演助興

學院院長馮應謙同Emily講，今次50周年主題，係為新傳學院搞一場中式賀壽，因此諗出製作一個大花牌，迎接校友之餘可以畀人影吓相同「些牙」，因此佢哋搵咗元朗「花牌大王」李炎記花店幫手製作，花費約萬元，可以擺放一星期。

另外，「小百萬」會有歡樂攤位，校友可重溫舊地，去即時留影攤位影相，又或購買學院明信片、郵票和紀念品。「新傳五十．張佬擺大壽」晚會有港式懷舊食物，好似砵仔糕、雞蛋仔和雪糕車等招呼校友，不過就唔係大魚大肉式嘅宴會，馮應謙話安排懷舊食物係想配合主題，亦等校友畀150蚊就有得玩有得食，唔使太貴。作為新傳校友嘅Rubberband歌手六號，同埋方健儀等一班校友主播亦會喺晚會表演助興。