【明報專訊】立法會噚日早上發生意外，一名女議員報稱受傷！案發地點係立法會6樓、民建聯議員辦公室樓層嘅女廁，事發時葛珮帆(EQ)去廁所，冷不防地面有一灘積水，當場跣低受傷，好彩冇撞傷個頭，事後自已行返辦公室，通知立法會秘書處跟進。

EQ跌親覺得手腫腳痛，下晝去咗中醫針灸，醫生話佢跌倒嘅無情力拉傷咗肩膀同腰部肌肉，左膝蓋瘀咗，𠵱家右手唔能夠用力、舉高同揮手。雖然呢啲係皮外傷，但𠵱家係區議會選舉期，落區拉票揮手時就要忍小小痛。佢嘅選舉對手係傷健人士葉榮。立法會人員之後去查下乜事，原來6樓女廁爆咗水管，所以先至流到一地水。