評論換局長 唐唐：人生有幾多個8年？
[2015.08.13] 發表
【明報專訊】特首梁振英(CY)早前撤換前民政事務局長曾德成同前公務員事務局長鄧國威，引起左派圈子同公務員幾大反彈，唔少建制中人都先後開腔，話覺得CY可以將件事處理得好啲。全國政協常委唐英年噚日出席公開活動時都加入評論陣營，佢話曾德成已經在任8年，更出金句，反問CY「人生中有幾多個8年？」，覺得換人時可以做得好啲，令雙方「好嚟好去」。
「曾德成服務8年 應有更好交代」
唐唐噚日出席「紫韻香江」展覽開幕典禮，呢個活動係紀念知名紫砂藝術家顧景舟誕辰100周年，展示宜興紫砂壺近數十年嘅風貌及變化。估唔到唐唐唔單止鍾意飲酒，原來都好品茶。
唐唐話，其實國際上更換內閣成員嘅情况好普遍，都唔係特殊情况，但政府可以處理得好啲，如果做得完美啲，對成個社會包括公務員係更加好。佢話曾德成服務咗政府同市民8年，應該有更好交代喎。至於新任民政事務局長劉江華，雖然佢一上任已經錄得「負民望」，但唐唐就話對方從政、服務市民咁多年，對劉江華能力有信心。至於CY，唐唐就話每任特首都面對好多挑戰，希望社會畀多啲空間同時間對方。噚日係CY生日，有記者問唐唐有咩講，唐唐就話「祝佢生日快樂囉」。
更多港聞
【明報專訊】特首梁振英61歲生日期間訪問珠海，與珠海市委書記李嘉會面，雖然無論香港同內地官員都曾經話港珠澳大橋難以喺2016年底建成，但李嘉...
詳情
相關新聞
